شتا

لما الدنيا بتشتى بنجرى
لما الدنيا بتشتى نخاف
شبح عمرى اللى بيجرى
يستخبى تحت لحاف

لما الدنيا بتشتى بنفرح نمشى اتنين عاشقين
لما الدنيا بتشتى بنجرح حتى دموعنا مش نازلين

لما الدنيا بتشتى دموعنا بس مش نازلين على الخد
زاد الهم وزادوا جروحنا ما أحنا فالحين نقتل بعض

كان صغير كان بيحلم وشتا نازل من حواليه
نفسه يكبر نفسه يكون نفسه يعيش فرحه والديه

كان مغمض قاعد خايف دنيا مليانه رعد و برق
وامه حاضناه أنت شايف جسد واحد مافهوش فرق

ربـــــــــاعــــيــــــــــات

قلم رصاص صغير مبرى وطالع عينه
كل اللى يكتب بيه يلعن سلسافينه
القلم كل ذنبه انه قلم رصاص صغير
و مش مشكلته ان الناس مش فاهمينه


عارف شعور لما دماغك تبقى سفنجه
و انك بقالك عشر سنين عايش فى خانكه
و ان كل اللى حواليك هبل و انت التمام
ايوه طبعا عارفه مش برضه عصير المانجه


كنت قاعد معايا و معرفش ليه خايف
خايف عليه ..او منى...مش عارف
طلع سكاتى قاللى كفاياك بقى مناهده
خلاص اخدت انا قرارى و قلتلى اّسف


جوايا عود حزين و قانون مضايق
بيعزفوا ويا بعض لحن الحقايق
العود حزين عشان خلاص وقته راح
و القانون مستنى فرج الخالق ع الخلايق

دنــــيــــــــا

دنياعيشانا ومش عايشنها
دنيا لا فاهمانا و لا احنا فاهمنها
دنيا عبيطة....حويطة...سليطة
تديك فوق راسك و فين يوجعك
و مين يسمعك
مين يسمعك من بعد كل العيون ماتعلقت على المشانق
من بعد حتى ما ودان الحيطان انسدت
من بعد العقول ما من كتر الهم ساحت
دنيـــــــــــــــــــــــا
دنيا ان دورت فى حواشيها يابنى تتعب
دنيا عشت فيها طول عمرى ساكت ولا كلمة
ماشى فى سكة مهببة و عتمة
رايج فين و جاى منين.....مابقتش فارقة
و تفرق فى ايه
ماهى هى دى الدنيا
دنيا عبيطة حويطة...بس سليطة
و فين يوجعك
20-12-2003 بلكونة رأفت

أبويا

حلف أبويا فى يوم
يضرب عيارين
فرحان بأبنه
عيار فى الهوا وعيار صابنى
عيار الفرح ده قتلنى
عيار خلانى مش قادر
مش قادر اقول أنا مين
عمال أسال عملت أنا ايه
هو يأمر و أنا أنفذ

بقيت حلمه ومش حلمى
بقيت فيلمه ومش فيلمى
بقيت كلمه ده بيقولها
ويرجع عليها ويلومنى

عمرى ما قلت انا مره لأ
عمرى ما رفعت عليه صوتى
حتى لو كنت يوم على حق
بعلن غضبى بسكوتى

سبته جريت وبقيت وحدى
ماشى فى غربتى بطولى
ضل هزايمى على أرضى
و مافيش مكان لسرورى

ما بقتش شايف قدامى
بشوف طريقى بكفوفى
واحد دلنى ورجع هدنى
فى نور الشمس مكفوفى

أنى ارجع مش كرامه
كرامه ايه ده دمى منه
يأسى عليا شويه و يحن
و برضه مكانى فى حضنه

ماهو أبويا

رباعيه مبدئيه

دخل التلميذ بجد و فتح كراسته
كتب و ذاكر لكنه فشل فى دراسته
التلميذ هو انا و الاستاذ كان جاهين
ياريت يخلينى فراش فى مدرسته
وعجبى

لسع العسل

بتخدعينى وتقولى لسه دموعى على خدى
وانا أصدق وأقولك دموعك غاليه قوى عندى
ملحقناش انك تنسى
ده أحنا كنا لسه أمبارح
نسيتى كلامى وهمسى
و نسيت كلامك الجارح

فجاه لقيتك حاضنه ايده
ولقيتك فى وسط عيده
ولقيت الفرحه فى عيونه
رهيب جنس النسا وكيده

كنت عارف بس دايما كنت بكدب نفسى
عارف انك بياعه غداره ولا حتى بتحسى
مش باكى على أيامك ولا لحظه وياكى
مش باكى على قربى ولمسه وانا معاكى
أنا باكى على أنى فى يوم كنت اعرفك
مفيش دلوقتى جوايا غير أنى بكرهك

نصيحه منى يا اللى ماشى معاها
أنفد بجلدك منها ده الغدر جواها
شىء جميل انك فى حضنها فرحان
بس الغريب انك فى حضن تعبان

وأوعى تدوق العسل

آه لو مالت

فاكر لما القلب دق
فاكرلما حس و أتهز
وجرى و فكر
مال وأتألم
ووقف
وقف يتفرج عليها وهي بتحكى
وقف يتابع احلى حركه شفايف
وقف يقول المره دى مش خايف
راح أقول راح أتكلم
راح أبوح باللى جوايا
راح أسكت
وهىتحس
تحس بيا وباللى جرالى
تحس بيا ترأف بحالى
المهم تحس
عارف يعنى ايه انك جبان
انك مستخبى ورا أحلام
حبك طى الكتمان
جبان
جبان وخايف كمان
خايف لتصدك
خايف لتقول لأ
طب ما تقول
ده لو قالت
و آه تقول
ده لو مالت

آه لو مالت

بنتولد....نايمييييييين

بهية ماتت من كتر البكا على ياسين
و نعيمة دفنوها جنب حسن وراحوا و ارتاحوا
والناس مس حاسين لساهم نايمين
يروح اللى يروح و يجى اللى يجيى
و الناس فين !!!؟؟
ياعم باقولك نايمين
مظاهرات و حرب و ضرب
و العراق و فلسطين
قلت فين؟؟!! نايمييييييين
ارهاب و ناس كلاب

و ناس تهاتي : يا ناس انتوا فين؟؟
و طى صوتك ياعم نايمييييييييين
و ناس قاعدة على الكراسى مستريحين
واكلين.....شاربين ....و ماهماش ماشيين
وفين اللى يحاسبهم؟؟؟
يوووه انت غبى ياد نايمييييين
شباب تموت و تعيش؟؟
استنى مش شباب برده يعنى اللى هما فى الاربعين
اسكت ياعم
و شباب تموت و تعيش
و الناس ولا هما سألين؟؟
يابا مش فاضيين .....الله مش نايميييين
طب على افتراض انى انا و انت من الناس
يبقى احنا ليه قاعدين؟؟؟؟
زهقت انا من كتر الزعيق و الندا
و خدتنى و رحنا نايميييييين

الصيف الشتوى ؟!!!؟ و ماله

ربما امتلات الأسكندرية بالاثام فاراد الله ان يطهرها و
ربما كانت مجرد فضفضة سماوية
ان تمطر فى مايو؟؟؟؟
لعله خيرا
المهم انى فرحان اوى بالشتا

عـلـشـانـك

علشانك كنت وبيكى مابقتش خايف
علشانك بصيت قدامى بقيت شايف
وعلشانك قررت اكون اخيرا انسان
حبيتك؟؟ايوه..حبيتينى؟؟مش عارف

قلتيلى بحبك و كانت طالعه من قلبك
صدقتك ومشيت وراكى و قلت زيك
تسيبينى ليه اشد فى شعرى و اكل زلط
مش عارف اقول غير حاجه واحدة بحبك

لو كنت فى يوم حبيتينى بجد ماتنسيش
بحبك بتحبينى ..كفاية ممكن نعيش
ليه بتموتى حبى و هو لسه بيحبى
و حياة اغلى حاجة عندك ماتسبينيش

رباعيات قديمه شوية

واقف من بعيد باتفرج و ساكت
علي حبيبتى من بعد ما اختارت
اختارت تكون نقطة سودا
ملاك ابيض جميل...بس باهت
19-12-2003 بلكونة رأفت-الابراهيمية

باحب البحرواحب اغنى واحب صحابى
و باحب بنت حلوة و احب جزمتى و شرابى
و حاجات تانية كتير اوى برضه باحبها
بس المصيبة انى باحب اكتر عذابى
11-12-2003 نفس البلكونة-الابراهيمية

تلات تيام عدوا و موحشتنيش
نفسى اشوفك بس ماتشوفينيش
المس شعرك بنظرة عينيا
بحبك ايوه..بس انا عايز اعيش
10-11-2003

و اسمع ياخويا اخر كلام الوجودية
حرية و التزام ووجود يسبق الماهية
و عمك سارتر يقولك فى كلام حرام
مع ان اصلا امه من السعودية
8-1-2003

رباعيات لعم صلاح جاهين

دخل الشتا و قفل البيبان على البيوت

و جعل شعاع الشمس خيط عنكبوت

وحاجات كتير بتموت ف ليل الشتا

لكن حاجات اكتر بترفض تموت

وعجبى

يا باب ايا مقفول ....امتى الدخول

صبرت ياما و اللى يصبر ينول

دقيت سنين و الرد يرجع لى : مين؟

لو كنت اعرف مين انا كنت اقول

و عجبى

انا شاب لكن عمرى و لا الف عام

وحـيـد و لـكـن بين ضلـوعى زحام

خــايف... و لكن خـوفى منـى انا

اخرس ....ولكن قلبى مليان كلام

وعجبى

اقلع غماك يا طور و ارفض تلف

اكسر تروس الساقية و اشتم و تف

قال: بس خطوة كمان..وخطوة كمان

يا اوصل نهاية السكة يا البير يجف

و عجبى

يا ميت ندامه ع القلوب الخلا

لا محبة فيها و لا كراهه و لا

حتى يا قلبى الحزن ماعدش فيك

معلش ..لك يوم برضه راح تتملى

و عجبى

حاسب من الاحزان و حاسب لها

حاسب على رقابيك من حبلها

راح تنتهى و لابد راح تنتهى

مش انتهت احزان من قبلها!!؟

و عجبى

أنا نفسى أعيش

ساعات بحس أنى أنجرحت
و ساعات بحس أنى أندبحت
و ساعات بحس أنى فرحت
و ساعات باعيش

ساعات بحب كل الناس
و ساعات بكون قلب حساس
وساعات بحس أنى محتاس
لأنى بحس أنى مفيش

ساعات تعدى و تفوت عليا
ما أعرف مين ليا ومين عليا
ما هى لو خربت هتخرب بيا
مع أن نفسى أنى أعيش

أعيش عشانى و لا لغيرى
أعيش بقلبى راضى ضميرى
و لا طوز و قضيها ميرى
وليه يا دنيا مسألتنيش

صحاب كتير عدوا وراحوا
لا أرتحت أنا و لا هم أرتاحوا
ما فضلش فى القلب الا جراحه
طب روح يا قلب ما تلزمنيش

أنا مش هاكون غيرى أنا
هتجن خلاص من كام سنه
وحدى أنا ... معاهم مش أنا
طب ليه كده متسألونيش

جايز أكيد منى العيب
خبطه تعدى و خبطه تصيب
خبطه فى راسى و خبطه فى جيب
خد حياتى و جرب عيش

يا مصر يا أم الهوا و النور
حياتى فيكى فيها ميت سور
لا أنا عارف أسكت ولا حتى أُثور
كله بينهش لجل العيش

جايز حلى أنى أحب
أحب مين و بأنهو قلب
هواللى جوه ده حتى قلب
ده شوية جراح ما تتنسيش

كان نفسى أعيش
كان نفسى أعيش

كنت

حبيتها لحد ما أتكلمت

س ص ع

س ص ع فركش حبيتها و ما أتكلمتش

لو تقبلى

هاكونلك طير وأكونلك طيف
هاكونلك خير و اكونلك سيف
لو تقبلى

لعنـــــات

لعنـــــات الدنيا تنهــــال على قلب كان لانسان
والقلــــب يصــرخ يتـألم و يقـول كنت الولـــهان
فى حب حبيبتى سرت الى حيث لا أدرى مكانى
وفقدت كل من حولى اصحـاب كانوا فى زمانى
وكأنى انســــان يغرق فى بحـار بلا شطائـنـى
و كأنى ذرة رمــــل تحــت جيــــوش سليمـــــان
تصرخ بمــن حولـــها ولكن عجبــــا بلا لســــان
كانت هى حبى عشقى كل ما أعرفه من معانى
كانــت صديقـــى رفيقـــى عقلى و وجدانــــى
كانــت جزء منـــى شخصـــى و كـــل الأمانــى
فاذا بها تتركنى وتذهب وكأنها تجمع أكفانى
نعم .....فلأمــت فبعدها لا يوجد الا الأحزانـــــى

رباعيات ممدوحيه

حبك بيخرج من صدري في دخان سيجارتي
و بيخرج معاه قلقي منك و خوفى و حيرتي
سيجا رة ولعتها و شربتها و ا كيد حتخلص
و صدقيني حتكوني اخر سيجارة في طفايتي

لما الدنيا تسكت و متسمعش صوت حد
لما الدنيا تمطر و تتملي برق و رعد
لما يكون مفيش حد تكلمه غيرك انت
صدقني مش غلطتك ولا هي غلطة حد

عود حزين و يّاه قانون في الخلفية
شباك قديم جمبه صورة راجل بكوفية
اوضة ضلمة مش باين منها حاجة خالص
و بقايا واحد قاعد عينيه تشبه عينيا