رباعيات

لو كان على الحلم خلاص حلمته مبيتحققش
و فيلم حياتى خلاص أنا شوفتو ما بيتغيرش
خلاص سلام يا دنيا بس أبقى أفتكرينى
كان فيكى راجل بس يا عينى ما بيعرفش

يا أبن الذى و الذين كانوا مين
يا أبن الذى و الذين راحوا فين
مصيبه كبيره لوقلتلى بعشقك
والمصيبه لو قلتلى بتحب مين


يا قلبى لا تبكى لا تحزن و عيش
شوف الألم اللى أصبح مفيش
الأمل هو اللى أحياك من تانى
وهواللى خلى الفاجر درويش

ساكت واللسان عن الكلام امتنع
راضى واللسان جوه الحلق انبلع
بس آه خايف منك قوى يا دنيا
يقولوا ان ده كله .........كان دلع

و عجبى

شىء مشروع

كان شىء مشروع
أعمل مشروع
وأجيب مشروع
أدفع قسطه انا بالأسبوع
كان شىء مشروع
أدخل فرحان انا بيه فى الحى
وادبح خروفين و تزغرط مى
وأدى للناس من اللحم النى
كان شىء مشروع
رسمت عليه خمسات بالدم
ربك يكرم و يزيح الهم
ويسهلها و فلوسه تتلم
كان شىء مشروع
تعالىمنشيه وبحرى يا بيه
الأجره بنص اتنين بجنيه
متيالا يا أسطى مستنى ايه
كمل المشروع
دور وعلى الله يلا أتوكل
سوق بالراحه ولا تستعجل
رزقك هيجى ربى يسهل
كان شىء مشروع
حد نازل كوبرى ستالى
نزلنى فى رشدى يا أفندى
لسالك نص جنيه عندى
كده فى المشروع
النفق الجاى والله يا ريس
دخل الليل وشكلى هاهيس
أركنها وكده فل كويس
وأهو دة المشروع