مش ساعات كتير بتحس انك ماشى كده و فى ودنك مزيكا شغالة او أغنية تعد مطلعة عينك كام يوم بترن فى ودانك
دايما كنت باستغرب أوى من الموضوع ده بس ساعات كتير كنت باضايق عشان المزيكا مش ماشية مع المشهد
يعنى مثلا نازل الصبح بدرى كده و فايق و حاسس ان اليوم يمكن يكون حلو ألاقى فى ودانى أغنية "ايه يا بلاد يا غريبه" اييه ياعم مش ناقصة على الصبح تفاؤوووول يعنى مثلا"يا صباح الخير ياللى معانا "والحاجات اللى بتعمل ديه
حاجة تانيه مثلا بنت زى القمر جايه فى وشى و بتبصلى و بتضحك ألاقى المزيكا شغاله "احنا فى زمن الوحوش قاسيين ما بيرحموش" الله وبعدين يعنى فى الراجل بتاع المزيكا ده ياعم بنت زى القمر يعنى مزيكا كلاسيك ناعمة اى حاجة
حاجة كمان ساعات وانا مضايق أوى بيبقى نفسى المزيكا تقلب حزاينى الاقينى بادندن" كان فى فراشة صوغنططه"أو "انا ابريق الشاى" ايييييه ياعم هو فين المخرج بتاع الفيلم ده
ساعات بقه لما المخرج بيكون صاحى بيبقى عليه شوية حاجات
مثلا مش فاكر ولا مرة كنت فى القاهرة الا لازم اسمع فى ودانى " القلق جوا العيون وشها له الف لون حزنها غير حزننا منها وحنا لوحدنا فى المدينه هنا و لفوا بينا" لما باكون على البحر بيبقى الموضوع غريب ألف اغنيه بتشتغل وكان الراجل مش عرف يشغل ايه ولا ايه
لما بافتكرها بافتكر فيروز وعندى ثقة فيك"باكتب شعر فيك باكتب نثر فيك وبيكفى معقول فى اكتر انا ما عندى اكتر ما كل الجمل عم تنتهى فيك" وبرضه مفيش فايده
بقالى مدة كده مفيش اى مزيكا شغالة فى ودانى مش عرف المخرج نايم ولا الراجل بتاع المزيكا هاجر ولا ايه بالظبط
