الدنيا لما بتشتى

الدنيا لما بتشتى كلة بيجرى و يستخبى
مع ان الشتا بيغسلنا بس احنا ساعات كتير
بنخاف اننا ننضف أحسن ننكشف
طبع فينا من أيام الملك رمسيس
دة ساكت من زمان و صابر
خاف هو كمان و استخبى من الميدان
مش عارف استخبى ولا هما اللى خابوه
خافوا أحسن يتكلم و مش هيعرفوا يسكتوه
اصلوا كان ملك راجل و شجاع
يا خساره يا مصر كان فيكى رجاله
جبان أنا فى وسط دنيا عاملين أنهم مكفوفين
بس هما من كتر التمثيل صدقوا و أتعميوا بجد
و انا عرفت هاعمل ايه
ماهو مينفعش ما اعملشى حاجه
هاحط صباعى فى عينى و أسكت
بلادى بلادى بلادى لك حبى و فؤادى
الدنيا لما بتشتى

دنيا

مسحول انا فى ساقيه وكله عمال يضرب
مانيش عارف رايح فين و لا أمتى هاوصل
باصص قدامى و خايف أنى أقع وماشى
ولسه الضرب شغال ما أعرفشى ليه
وكل يوم أقول لنفسى أجمد بكره الضرب يخ
لا فى يوم وصلت ولا حتى ضهرى مات

فى يوم قررت ماانيش ماشى
لا كرباج يهم ولا زعيق
سابونى ولا حد كان جنبى
لحد ما مات القلب من الوحدة
يا ولاد الكلب ده أنا هو
اللى ياما أتلمينا على لقمه
يوم ما يعجز الدراع
أموت انا ولا حد يتهز
طب وفيها أيه ما أموت و خلاص
طز فى دنيا أولها هو أخرها

أعقل و أرجع يا بنى آدم
ده العمل برضه كله عباده
الجته أتهدت ياما و زياده
بس أمرى اكونلك الراجل
أرفع راسك فى السما و أناضل
ولا أحسن ألفلى لفتين فى الساقيه
لجل الوكل

تفتكر فى حد

تفتكر فى حد هايجى
يا ترى ممكن
حد يحس أن فى هنا حد
أنا مش شايف ان لسه فى أمل
أنا مش مستعجل
بس زهقت

شفت الفرحه اللى فى عيونه
شفت ازاى كان طاير
انا حسيتو
فرحان زعلان
متلغبط حيران
عايز يضحك عايز يفرح
عايز يبكى كمان
أنامش مستعجل
بس زهقت
انا يا دنيا برضه انسان

فرحان اوى لفرحه
خايف ليشوف جرحه
صريح فى دنيا فيها الكلب ملك
ولجل ما تكون
مش شرط تبقى كلب
بس على الأقل
تبوس رجل الملك

اه منك يا مصر رخصتينا
رخصتينا فى سوق الرجال
لطايلين نعيش و لا حتى نكون
حتى لو نكون نفسينا
منك يا مصر بقينا
بنخون نفسينا
انا مش مستعجل بس زهقت

ح ل م

زمان كان حلمى أنى أكون
اكون عاشق اكون معشوق
المهم انى اكون جوه القصه
القصه اللى بيحلم بيها كل وحيد
آه بحبك ومش هاعيش من غيرك
ولو فين انتى هاجرى عليكى
أحضن فيكى وأحط حلمى جوه عنيكى
فيهم الدفا فيهم باحس أنى ولا
فيهم نسيت انى انا و أنى لازم أكون
فى عنيكى ماتت جراحى
حسيت أنى مش هاكون غير بيكى و ليكى
وعلشان ما أكون ليكى لازم أكون
أكون ما تريدى بس احلمى و شاورى
شاورى نفسك م انا نفسك
أحلمى حلمك بنفسك بس آمرى
لجل ما أعيش

أتكلمت لقيت كلامها كلامى
لقيتها بتسبقنى بتقولى اللى فى بالى
يا كل مااقدر أقول أنك انا
يا كل حلمى و فكرى
يا ألمى فى عز فرحى
يا أحلى حاجه ممكن كنت أحلم بيها
لسه مستنى لسه مستنى
أن حلمى يحصل و ألقاكى
و أعيش القصه اللى بيحلم بيها كل وحيد

ضلمه

كل واحد له طريقه
طريق طويل
و فى اخره قنديل
هما بصراحه كذا قنديل
كل ما توصل واحد
يحلى اللى وراه
وطبعا حواليك ضلمه
ضلمه انت اللى عامله
لجل ما تحس بالكفاح

و ريح ساعات تجريك
و ساعات يوقفوا فيك
لجل ما يعلوا هما
او لمجرد احباطك

ليالى تعدى ورا ليالى
اه ماهو مافيش نهار
وانت ماشى فى طريقك
ومش عارف هاتوصل امتى
لما الضلمه تخلص
ولا لما انت تشوف