ماتصحينيش

و حياة الغالى عندك ماتصحينيش

ماتخدنيش من وسط أحضان حلم ماعشتهوش

جوايا كلام كتير ماقلتهوش

وضحك ماضحكتهوش

وأحلام كتير قوى طلعت فى الفاشوش

سيبنى نايم فى دنيا لسا السما فيها مزرقه

وأصوات عيال و دفا و عصافير و زقزقه

وأصحاب كتير واخدين بأيدى و حب و لقا

دنيا مافيهاش ليه و بكام و ازاى

مفيهاش كلام و لا خصام و لا لقلقه

سيبنى عايم فى مية بطيخ الاحلام
ولا نايم فوق سحابة محشيه اوهام

ساكن فوق شجرة نصها مانجه والنص التانى برتقان

سيبنى عايش جوايا

ماطلعنيش فى وسط ناس مش ناس

و تقوللى عيش

وحياة الغالى عندك ماتصحينيش

مش فاكر التاريخ ولا المكان بس كاتبها علشانك يارب بس تعرف انها علشانك يمكن نرجع زى زمان*

مالناش غير بعض

معرفش ليه أول ما سمعت الغنوة أفتكرتها أوى

أول مرة سمعتها كنت فى رمضان فى حفلة أفتكرتها

وأول ما سمعت الشريط برضه أفتكرتها

مادرتش بنفسى الا بعض المرة الستين قلت مابدهاش و باعتهالها فى إيمايل وبرضه مفيش فايده

الغنوة هى عنوان البوست"مالناش غير بعض"وجيه عزيز بيغنى وكلام على سلامة وألحان وتوزيع وجيه

وموجودة فى شريط وجيه عزيز الجديد "ناقص حته"وللى عايز يسمع الغنوة-----> مالناش غير بعض

ومالناش غير بعض..... مش كده ولا ايه

تحديث:غيرت اللينك بتاع الغنوة عشان تبقى كاملة بناء على طلب المستمعين*