أبريق حنان

من اد ايه و انا زهقان

مستنى حد يطبطب عليه

مستنى حضن حنّيه

حد انشالله غريب معدى يخدنى باللى فيا

برميل حنان واتملا فاض من الجمبين

لا حد شرب منه

ولا هو يوم ارتوى

الصبر زاد عكر الحنان

ملاه بسم الانتظار

و ايه يعمل اللى بحنانه اتملا.......وعجبى

حكيولى

حكيولى عنه وقالوا كلام
مصدقتيش
قالوا لما تشوفوا
ولما شفته لقيته ملاك
مصدقتيش
من كتر كسوفوا

يا أحلىحاجه فى دنيتى
يا حلمى عشقى و جنتى
يا عمرى وسر فرحتى
أنا بعشقك

بموت انا لما بتسكت
وتبصلى كدهوا بصه
الاقى روحى أتخضت
واقول يا قلبى آه حسه

ولما تحكى قلبى يطير
يطير يرفرف حواليه
وأقول يا قلبى بس خلاص
أنا ماليش الا هى

بعشقك

بتحسبينى بعشقك
بتحسبينى واحد من عشاقك
كل مره باندهك
فكرك أنى خلاص مش قد فراقك
لا يا حبيبتى اسمعى
حبك أنت مش خيالى
لا يا حبيبتى أفهمى
حبك أنت ولا على بالى

أيوه كان حلمى أنى أقرب
لما كان قمرك بعيد
دلوقتى بقى أملى أنى أهرب
معاكى عمرى ماهكون سعيد

عشقك فى قلبى أتمحى
مابقاش فاضل حتى الذكرى
قلبى خلاص فاق صحى
وأتعلم زيك يكره

أحلام العيال

لسّانى ماسك فى أحلام العيال

و لما اكبر ناوى أطلع طيار

أجيب عربيه حمرة و أخاف من الكلاب

و نفضل أنا و البنت ام ضفاير صحاب

وافرح بالجذمة و اللبس الجديد

و اجرى و اهيص و اقول بكره عيد

اخاصم حماده لما يضرب منال

ويوم الجمعة اجرى اتفرج على سينما الاطفال

اقرا (ارض فضاء)و افتكرها حته من القمر

و فى الصيف اسهر و امى تقوللى بلاش سهر

و يرح القمر و ييجى خمسين غيره

و تروح السنين و تيجى سنين غيرها

و الاقى قلبى لسه بيتخطف منى

لما أعدى على بنت صغيرة بتغنى

كانت بتغنى و تقول

كان فى فراشة صوغنططة

بس يا خسارة....الفراشة كبرت

اتنين صحاب

مش قصدى ازعلك

انا بس بشكيلك

تحكيلى و احكيلك

يمكن نرجع زى زمان و نتلم

ماهو من كتر الهم

بقيت انا فى حته و انت فى حته

و الحتتين مش جمب بعض

مابقيناش جوز بقينا فرد

فردين بيدوروا على حاجة تفرحهم

متأخذنيش شردت انا منك زى العادة

قول سامعك.....مالك؟؟

بتقول حزين ...تعيس..و وحدانى

عارف انا مرة واحد فرحان جانى

قاللى مالك زعلان كده ليه؟

قلتله بص ياسمك ايه

انا مرة ابتسمت ماتت البسمه على شفايفى

و حاسّيت بحاجة كده مش عارف هى ايه

يكونش عندى الضغط

شردت منك انا تانى

متأخذنيش انا مش قصدى ازعلك

انا بس بشكيلك

الشتا حواديت

الشتا حواديت

كل نقطة نازلة بحدوتة اّلهية

لجل ماتدى البشر شوية عبّر

و احنا البشر بكل كبر

بنسيبه ينزل و مابنقرهوش

و ان حتى قرينا مابنفهموش

نسيبه ينزل على الارض

يحكيلها و تشكيله

تشكيله من اقدام البشر الدايسين فوقيها

قرب ودنك من الارض ساعة شتا

حتسمع احلى كلام قاله ربنا

الارض فاهماه إكمنها موّحده

سامعاه و حاسّاه و فوق كل ده

ماهياش بشر

الشتا حواديت

كل حدوته تاخدك للسما السابعة

تطير بيك فى كل الارض فى لحظه واحدة

و إكمن الشتا مليان بحواديت ربنا

يبقى لازمله تفسير

بصيت أنا للارض مستنى تحنّ عليا

و تدينى تفسير لحواديت المطر ساعة شتا

قهوة محوجة

باحب الشيكولاتة و العمل عبادة

و القهوة زيادة بس مش فى فنجان

و اكمن الحبهان بيطلعلى فى الشوربة

بطلت انا الشوربة و مقضيها بتنجان

و دايما سرحان و مفيش الوان

مجرد حياه بالابيض و الاسود

و اوعاك تحود عن طريق ماشى فيه سكران

و اكمنها زياده يبقى كالعادة حتلاقيها مليانة بالحبهان

هو صحيح كلام فى التوهان بس كله فى دماغى

عمال يجرى قدامى و انا سرحان

و إلى الان كل الزيادة و الحبهان و البتنجان

عاملينلى جنان جوه دماغى

و انا سرحان

ماتصحينيش

و حياة الغالى عندك ماتصحينيش

ماتخدنيش من وسط أحضان حلم ماعشتهوش

جوايا كلام كتير ماقلتهوش

وضحك ماضحكتهوش

وأحلام كتير قوى طلعت فى الفاشوش

سيبنى نايم فى دنيا لسا السما فيها مزرقه

وأصوات عيال و دفا و عصافير و زقزقه

وأصحاب كتير واخدين بأيدى و حب و لقا

دنيا مافيهاش ليه و بكام و ازاى

مفيهاش كلام و لا خصام و لا لقلقه

سيبنى عايم فى مية بطيخ الاحلام
ولا نايم فوق سحابة محشيه اوهام

ساكن فوق شجرة نصها مانجه والنص التانى برتقان

سيبنى عايش جوايا

ماطلعنيش فى وسط ناس مش ناس

و تقوللى عيش

وحياة الغالى عندك ماتصحينيش

مش فاكر التاريخ ولا المكان بس كاتبها علشانك يارب بس تعرف انها علشانك يمكن نرجع زى زمان*

مالناش غير بعض

معرفش ليه أول ما سمعت الغنوة أفتكرتها أوى

أول مرة سمعتها كنت فى رمضان فى حفلة أفتكرتها

وأول ما سمعت الشريط برضه أفتكرتها

مادرتش بنفسى الا بعض المرة الستين قلت مابدهاش و باعتهالها فى إيمايل وبرضه مفيش فايده

الغنوة هى عنوان البوست"مالناش غير بعض"وجيه عزيز بيغنى وكلام على سلامة وألحان وتوزيع وجيه

وموجودة فى شريط وجيه عزيز الجديد "ناقص حته"وللى عايز يسمع الغنوة-----> مالناش غير بعض

ومالناش غير بعض..... مش كده ولا ايه

تحديث:غيرت اللينك بتاع الغنوة عشان تبقى كاملة بناء على طلب المستمعين*

و عجبى

كلاب ...... كلوبه ...... متكلبه بكلالــــيب
يا عينى دى مغلوبه مرميه فى الدواليب
ذكرى و ضحكه و آه و آهتين يا سيدى
ضاع العمر بيدور على الحظ فى الكراكيب

ملفوفه بملايه ماعداعينها
تحتارمن شدةقوامها و لينها
أموت أنا فى بمبية الكعب
يقطع ليالى الهوى وسنينها


خليك يا ريس زى ما انت
اكيد صح مادام الناس ساكته
مش ساكتين علشان خايفين لأ
ساكتين علشان مابقتشى فارقه


كانت فرحه عشقه كانت جنته
سبتوه فى لحظه من بعد ما جنته
كان راجل بيموتوا و يعشقوا فيه
بقى كلمه بتعدى فى موال غنته