العيد عيدنا و حانعيد

pause بقالى كتيركده عامل

واقف متنح للدنيا و ضارب بوز

انا قلت كفاية و اعمل زى الناس

رحت اعيّد ..حطيت الكحك و شلت الفانوس

كل سنة و انتوا طيبين

من وقت للتانى

من وقت للتانى

لما باحس بقرب أحزانى

باخاف منها و أجرى بسرعة

وأستخبى فى حضن أول سراب

وأفتكره باب...باب أمل حيعدينى لأبعد الأحلام

أصدق وأعدى منه و أنام

وأفوق على ريحة أحزانى بتصحينى

من وقت للتانى

لما بتملانى أحزانى

أجرى أدور على أى قلة

وأشرب من مية الأحلام

وأخاف أنام لاصحى على ريحة موت

موت الحلم الضعيف على أيد الأحزان

من وقت للتانى

باستسلم لأحزانى

و أتمنى يجى اليوم و أموت جنب أحلامى الضعاف

وأخاف....لو اليوم ده مايجيش

كلام مع واحد ماعرفوش

على فكرة الموضوع مش زى مانتا فاكر
مانيش نايم..ولا مجنون ...ولا صايم
انا بس مستنى
ومتسألنيش مستنى ايه
عشان بجد...... مش عارف
يمكن مستنى جنة على الارض ماشفتهاش
او غنوة فى حياتى ماسمعتهاش
او حتى صاحب يقوللى كلمة من زمان ماقلهاش
اّه مستنى.......ايه بتبصلى كده ليه؟؟
و بتقول ايه؟!؟!؟؟ كلامى عايم
والله ياعم انا مش مجنون و لا صايم
انا بس مستنى
عارف يمكن اكون مستنى قبرى
او حتى يخلص صبرى
تعبنى وجع سكاتى...ولما بانطق بانطق بالخرس
وهو ده مربط الفرس
لسه برضه كلامى عايم؟
مانيش مجنون ولا صايم
انا بس مستنى اعيش فى دنيا ماعشتهاش