رباعيات كئيبة شويه...

1- حلمى كان عبيط قوى بس حلمته
شيلته فى قلبى سنين طوال و كتمته
حلمى شاب و عجز و مات ..و هو بيحلم
مات وعلى شفايفو لساها موجودة ابتسامته


2- فوق بقه و انزل بدماغك للناس
كفاياك احلام و كلام .. واحساس
الدنيا ماهياش حلم عايشو فى دماغك
ولا هى فيلم بطلته منك حاتتباس


3- لسـاك مـسـتـنى يـابن الطـيبـين موتك
لساك فرحان سعيد و راضى بسكوتك
لساك بتاخد بالكف على خدك ولا دارى
لســاك قـاعـد بـتـفـكـر ايه شكـل تـابوتك


4- لو قلتلك حاييجى يوم وفيه نعيش ماتصدقنيش
انك فى يوم تصحى تلاقى صورتى على افيش
او تلاقينى انا و انت ماشيين و فى ادينا عيال
ماتصدقنيش عشان كله كله... كلام على مافيش

رباعيات تانى ....

1- قاعد بفكر مش عارف فى ايه
مليون سؤال ..بكام ولمين؟؟وليه؟
الفكرة مابقتش بكام ولا لمين ولا ازاى
الفكرة بقت انك تلاقى دماغ تفكر بيه

2- وايه اخرتها معاك ياللى عامل مش موجود
عامل عبيط ومش شايف و لا لك وجود
حتفضل لامتى مستنى حد يجيلك يشيلك
"البنى ادم الذىطلبته ربما يكون مفقود"

3- كائن كئيب انا باتغذى على احزانى
محلتيش غيرى انا محلتيش غير ودانى
اسمع و اسكت...اسمع واتملى بالهم
وان جالى فرح او حب اقولوهم فوتوا تانى

4- كل ما امسك قلم و اقول خلاص حاكتب
الاقى القلم هربان و الورق كله اتشقلب
قلمى بطل يصاحبنى و الورق خلاص داب
كسرت قلمى و رميت الورق ...بس حاكتب

أنا مين

أنا الكبير أنا الصغير
أنا العويل أنا المسيطر
أنا الجبان انا الشجاع
أنا الهجوم أنا الدفاع
أتا اللذيذ أنا الممل
أنا الأقوى أنا الأقل

ماسكات تتحط على الوش
ما يبنش الحق من الغش
القوى بيقبل و بيضرب
والضعيف على طول يكش

أنا مين و فين و ليه
أنا تايه فى الدنيا ليه
لأ انا عارف لأ انا واعى
مفيش غيرى هاضحك عليه

انا كلمه فى وسط جواب
انا طبله و أكرة باب
انا كلب جبان مستخبى
انا وردة بين الأحباب

انا مين ومين انا
محتار من كام سنه
انا جايز راجل على قده
أو مات من كتر الهنا

أنا مين من ضمن الماسكات
لا أنا عارف أصحى و لا أبات
أنا فعلا حاجه كبيرة
ولا مش لازم أنا بالذات

أنا مين

كلاب

فى كلاب بتعدى
و كلاب بتهدى
وكلاب بتصدى .......... من كتر الركنه
فى كلاب سعرانه
على طول وكلانه
لأ مش حميانه..........ولا هاديه وساكنه
فى كلاب آه بديل
و الشعر طويل
والخصر نحيل ...........ويقولك مكنه
فى كلاب وأنا منهم
مجروحه قلوبهم
سهرانه عيونهم..........أحلامهم داكنه
فى كلاب آه بدور
بتلف و تدورمسجونه بسور...........فى كنيسه بمدنه