زعلان ....و خايف

زعلان قوى و خايف
خايف مافرحش تانى
مش عارف ابتسم و حاولت كتير اضحك
مش طالع الضحك مخنوق جوايا
اخر واحد كلمنى بجد قالى شكلك بقى شبه الميتين
لما سألت قالولى عادى الدنيا يوم كده و يوم كده
استنيت انا اليوم الكده التانى ده و ماجاش
او يمكن جه و لقانى زعلان فا زعل معايا
او لقى مافيش امل انو يعمل حاجه
فا سابنى و مشى
............

مالقتش حاجه تانيه اكتبها فوقفت اتفرج على بقية الصفحة
اللى باصالى بتحدى عشان املاها فجريت انا حقنا للبتنجان
والسلام امانة
24/7/2007
وانا ماشى فى الشارع

ترام ازرق حزبن

ترام حزين ماشى فوق قضيبين حديد
مش حاسين بيه
ميعرفش غيرهم فى دنيته
ماشى فوقيهم حاضنهم و حاضنينه....و عايشين
لا يوم سالهم ايه جابكوا هنا
و لا هما سألوه ليه هو فوقيهم
كل يوم نفس المشوار رايح جاي
ميعرفش ليه و لا ازاي
كل اللى شايفوه قضبلن حديد قدامه ممدودين
يجرى فوقيهم ساعات
و ساعات بيمشى بشويش
ميعرفش غير لونه الازرق
اللى بهت من كتر هموم الناس اللى مليتوه
بياخد منهم همهم و الامهم و زهقهم
و فرحهم لأ
كان بقالى كتير ماشفتوش
لمحته النهارده ماشى
هو ..هو
نفس الترام الازرق الحزين ماشى فوق قضبانه الحديد

و النبى

والنبى يا مصر و حياة أمك
لجل مانجرى عليك ونضمك
سيبلنا حاجه تخلينا نفضل نحبك
وحياه شمسك وضلك
وحياه ناسك و اهلك
سيبلنا حاجه تخلينا نفضل نحبك
وحياه نيلك و بحرك
وحياه ظلمك و قهرك
سيبلنا حاجه تخلينا نفضل نحبك
وحياه الليل ما هو هيعدى
ولجل ولادى من بعدى
سيبلنا حاجه تخلينا نفضل نحبك
وحياه الفكر الفاضى
وحياه الصخب الهادى
سيبلنا حاجه تخلينا نفضل نحبك
وحياه فرعونك وهرمه
وحياه مصراوى وكرمه
سيبلنا حاجه تخلينا نفضل نحبك
وحياه حبك اللى جمعنا
وحياه الآه بمية معنى
سيبلنا حاجه تخلينا نفضل نحبك
و النبى

اسكندريه

اسكندريه يا أحلى حاجه فى الوجود
يا مليون كمنجه بيعزفوا لحن الخلود
يا جيتار و رق و قانون و عود
اسكندريه يا أحلى حاجه فى الوجود

يا فرحه عيون ناسك لحظة لقى
يا ضحكه جوه قلوب متشوقه
يا أجمل منشيه
ساعة الصبحيه
صيف شتا انا بعشقك
يا شط بحر طويل جميل
فى الخريف أنا بعبدك
يا ارق و أحلى و أجمل ناس
مين فى الربيع يكرهك

يا بوسه من شفايف مضمومه
يا أكله سمك فى اجدع عزومه
ايوه على بحرك
و يا سلام على أهلك
مين يطول يعيش فيكى
مين يطول يبوس أراضيكى
مهما بابعد بيفضل حبك جوايا
ومهما اقرب منك برضه مش كفايه
ما أنتى إسكندريه

الدنيا حر

الدنيا حر يا رجاله
أنا مش عارف اعمل أيه
شويه ضل بس هتبقى فل
مش طايق حد يلمسنى
ممكن شويه لو سمحتى
أه بعيد بس شويه
انا شكلى اتغيرت ولا ايه
و لا أتغيرت ولا حاجه
دى بس الدنيا حر
بس برضه غريبه
ده انا كنت الأول بتلكك
ربنا يستر

ممكن عينه لو سمحت
عينه من ايه بالظبط
شوف أنت
مممم بس ده فين
خش خلص نفسك
و انجز
أنجز
ازاى ده لازم روقان
طب ما تيجى تساعدنى يا جميل
أحترم

والله ما انت مكمله

فى ثوانى كانت العينه
الدكتور قالى
انت تمام يا ابو حميد
بس عندك شويه ضغط نفسى
وبعدين يا دكتور
ولا حاجه أطلع ريح بالك شويه فى مارينا
ده عبيط ده ولا ايه
مارينا
يعنى مزيد من الجمال والدلال
و الأهم مايوهات
مايوهات
يعنى احلى حاجه فى الدنيا
بس ده كده هيبقى اختبار
بدل ما يكون علاج
و أنا هسقط هسقط
مفيهاش
اول مره أكون فعلا
عايز اسقط

اهـــــــلـــــــــــــى......اهـــــــــلـــــــــى

من المخابرات الاهلوية العامة الى المخابرات الزملكاوية البغيضة
نشكركم على حسن تعاونكم على مدى 120 دقيقة و الى اللقاء فى عملية اخرى
قال ياخدوا الكاس قال.......هااااااأووو
و بيب بيب اهـــــــــــــــــــلــــــــــــــــــــــــــــــى